Jun 25, 2015

இரவின் காதலி-2

நினைவுகளின் பிரதிபலிப்பாய்
இரவின் பெருமூச்சுகள்
தூக்கத்தை முத்தமிட்டு
ஒத்தி வைக்கின்றன
 
இதுதான் சாக்கென்று
சலனமற்ற இருளின்
அகங்கார ஆலிங்கணம்
மீண்டு்ம் மீண்டும்
நிகழ்ந்தேறுகிறது
 
வியத்தல் விணை
விட்ட இடத்தினின்று
புனராவர்த்தம் செய்வது
முடியாது தொடர
 
ஆர்பரிப்பு அமைதியாகி
ஆனந்தம்
ஆழிப்பேரலையாகும் நேரம்
வைகறை வந்ததும்
விட்டொழித்துச் சென்றுவிட்டது
 
இறவாமல் பிறவாமல்
எனை ஆட்கொள்ள
இறைவனை வேண்டவில்லை
இருளிடம் மட்டும்
வேண்டுகிறேன்!!!

Apr 14, 2015

விடியல்

சில நொடி சந்தோஷத்தின்
ஊக்கத்தொகை
சில ஆண்டுகளுக்கான
கண்ணீர் விதி என


சிரிப்பின் முடிவில்
இரு க்ஷணங்கள்
என்ன காத்திருக்கிறதோ
என தொக்கி நிற்கின்றன

கிழமைக்கு ஒரு சாமியென
அட்டவணை போட்டுத் தரும்
அம்மாவும்

உனக்கு நேரம் நல்லா இருக்கு கண்ணு
எல்லாம் நல்லதா நடக்கும் என
அம்மாச்சியும்
ஆறுதல் சொல்ல ஆரம்பித்து
ஆண்டு பத்தாகிறது

ஆனால்..
எனக்கான விடியல் மட்டும்
நனைந்த விறகுக்கட்டையாய்
மூலையில் விழுந்தே  கிடக்கிறது..

Jan 9, 2015

இரவின் காதலி

இரவுகளின்
காதலி நான்

ஒளியின் ஆர்பரிப்பு
அடங்கிப் போன
மீளா இரவுக்காக
காத்திருக்கும்
காதலி நான்

உறங்கும் காதலன்
தோள் சாய்ந்து
உறங்காமல்
இருளை சூல் கொண்ட
இரவின் காதலி நான்

ஆயிரம் கனவுகளின்
ஒற்றை ஊன்றுகோல்
ஆயிரம் ஏமாற்றங்களின்
ஒற்றை ஆறுதல்

சப்தங்களும்
நயன பாஷகைளும்
அற்றுப் போன நிலையில்

விடை தெரியா
கடிதங்களின்
உணர்வுகளுடன் சல்லாபிக்கும்
இரவின் ஒருதலைக்
காதலி நான்!!!


Jan 8, 2015

தூக்கம் பறித்த இரவுகள்

சில நினைவுகள்
இரவுகளின்
சில நிமிடங்களைக்
கடன் வாங்கிக்கொள்கின்றன..

பிடித்த வரிகளுக்கிடையில்
லயித்த நொடிகள்
தூக்கம் களைத்துச்
செல்ல

கணத்த இதயத்துடன்
கவிதைக் காடுகளுக்குள்ளே
இரவின் உலாவல்
நிகழ்ந்தேறிக்கொண்டிருக்கிறது!!!