தூக்கம் பறித்த இரவுகள்

சில நினைவுகள்
இரவுகளின்
சில நிமிடங்களைக்
கடன் வாங்கிக்கொள்கின்றன..

பிடித்த வரிகளுக்கிடையில்
லயித்த நொடிகள்
தூக்கம் களைத்துச்
செல்ல

கணத்த இதயத்துடன்
கவிதைக் காடுகளுக்குள்ளே
இரவின் உலாவல்
நிகழ்ந்தேறிக்கொண்டிருக்கிறது!!!

உளறுகிறேன்!!!!

இரவின் நீட்சியில்

நினைவுகள்

சிறகு முளைக்கப்பெற்று

தூவானம் ஓயாத பொழுதுகளிலும்

கடைசி பறவையாய்

உடல் நனைத்து

சிறகுலர்த்திச் செல்கின்றன..

பிரிவுணர்ச்சியின் வலியும்

நினைவுகளின் சுகமும்

தக்கடையின் இரு தட்டுகளாய்..

முகத்திரை கிழித்தெறிந்து

கண்ணீரை அப்பிக்கொள்ள..

அட..

ஒழுங்காய் ஒரு காரணம்???

ஏதோ ஒன்றின் இழப்பில்

ஏதோ ஒன்றை அடைதல்

இயற்கையின் எடுத்தோத்து

நெஞ்சுக்கூட்டின் நடுவே

ஆழ்துளை கிணறு செய்து

இனம்புரியா உணர்ச்சிகளை

வாரி வெளியிறைக்கும்

முயற்சியில்

தோற்றுக்கொண்டே இருப்பது

இரவின் ஊழ்வினை

தூக்கத்தில்

உளறவில்லை..

தூங்காமல் உளறுகிறேன்..

மௌனத்தின் மறுமொழி

நுரையீரல் முழுதும்

நிறைத்துக்கொண்ட

அவன் வாசம்

துணைநின்ற

தனிமையின் உச்சத்தில்

அவன் அருகின்றி

பிரக்ஞை

அற்றுப்போன

தருணங்கள்

மரணிக்கக்

காத்திருக்கின்றன!!!

அம்மரணத்தின்

மறுமுனையில்

ஜனனிக்கக் காத்திருக்கும்

கனவுகளுக்காக நான்!!!

இயல்பிற்கப்பாற்பட்ட

மொழியின் மௌனம்

சாத்தியமான

வேளைகளில்

விழிநீரின்

ஒற்றைப் பரிமான

வரைகோடுகள்

அவன் திசைநோக்கியே

இடமாற்றம் பெறுகின்றன!!!

இரவுப்பயணம்

கவிழக் காத்திருக்கும்

இரவுக்குள்

அடங்கியிருக்கும்

எதிர்பார்ப்புகள்

ஊடலும் கூடலும்

கூடல் நிமித்தமான ஊடலுமாய்!!!

முன்னிரவின்

இதழ் ஒற்றலில்

துவங்கி

பின்னிரவின்

இமை ஓரத்துக்

கண்ணீரென

இடைப்பட்ட 

பயணத்தின்

நினைவுகள் யாவும்

தூரத்துத்

தேநீர் கடையில்

ஒலிக்கும்

நடுநிசி

இசைக்கோப்புகளின்

பல பல்லவிகளில்

இடைச்சொருகலாய்

நீண்ட நெடும் 

இரவுப்பயணத்தின்

ஒப்பந்தங்கள் யாவும்

முத்தங்கள் கொண்டே 

கையெழுத்தாகின்றன..

வரவு செலவுக்

கணக்கில்

காதல் மிகுந்த 

காமமும் 

காமம் மிகுந்த 

காதலும்!!!

எழுதித்தீராதது

உனக்கும் எனக்குமான 

உணர்வுகள்

சில வரி சிலாகிப்புக்குள்

அடங்கிப்போக

மறுதலிக்கின்றன...

சேர்த்து வைத்த

காதலும் காமமும்

எழுதிவிடின்

இளைத்திடுமோ???

எழுதித் தீர்த்திடவே

தேடியலைகிறேன்..

பாரம் ஏற்றுவதில்மட்டுமே

குறியாய் இருக்கின்றன..

அகத்திணையில்..

கிட்டாத வார்த்தைகளை

எட்டாத்தொலைவு வரை

தேடிச் சென்றும்

இல்லாமல் திரும்பிவருதல்

ஏமாற்றமில்லை!!!

கொஞ்சமாய் வீட்டு ஞாபகம்

கையை உதறிவிட்டு
ஓடும் குழந்தையாய்

திசை மறந்து

ஓடிசெல்கின்றன நினைவுகள்

கடிகார முட்களைப் போல்

துரத்திப் பிடித்தபடி ஒன்றும்

விட்டு விலகியபடி மற்றொன்றும்

கடந்து செல்லும் மனிதர்களில்

யாரோ ஒருவரின்

ஏதோ ஒரு சாயலோடு

சில நிகழ்வுகள் சில நினைவுகள்

பிடித்த பாட்டை முணுமுணுப்பதுபோல்

நாள்முழுதும் நீங்காமல்

இருபது நிமிட

தொலைப்பேசுதலில்

என் தூரத்து உலகிற்கும்

எனக்குமான இடைவெளியை

நிரப்பப் போராடும்

அம்மாக்களும் அம்மாச்சியும்..

நண்பனின் முகநூல் பக்கத்தின்

பழைய நாட்குறிப்பிலிருந்து

புதிதாய் பகிரப்பட்ட

ஒற்றைப் புகைப்படமுமே 

இழந்தவற்றிற்கான
ஒற்றைப்பருக்கை இழப்பீடு...

பார்த்து பேசிச்சிரிக்க

பழகிய மனிதரில்லாமல் 

ஏங்கித்தவிக்கையில்..

அரற்றல்

அடைத்த கதவுகளின்

இந்தப்புரத்தில்

ஒரு இருண்ட பாலைவனம்

அதில்

அழுந்தப் புதைக்கப்பட்ட வலிகள்

வடிகால் தேடும் முயற்சியில்

இதற்கென என்றின்றி

எதற்கென வேணினும்

பெருகக் காத்திருக்கும்

கண்ணீரும்

நடுநிசித் தேடல்களில்

ஏமாறித் திரும்பி வந்த

வெறுங்கையும்

நித்தம் ஒரு பொருள் சொல்லி

வெறுப்பை விழுங்க வைக்க

பழுப்பேறிய நாட்களின்

மூடுபனித் துயரமென

ஊடலும் கூடலுமான  நினைவுகள்

கொஞ்சம் கொஞ்சமாய்

என்னை உடைக்கும் வேளையில்

சலனமற்றத் தனிமையின்

பெருங்குரல் அரற்றலின்

எதிரொலியாய்

கழுத்தையிறுக்கும் பயம்

சோறுண்ண உயிர்வாழ

நீ நிறைந்திருக்கும்

தூரத்துக் கனவுகள் மட்டுமே

ஊக்கமாய்

நனவின் உணர்வுகள்

நலிந்துபோய் நான்..